| მთავარი » ფაილები » News |
მოსკოვი ნოღაიდელს საქართველოს ოპოზიციის ლიდერად წარმოაჩენს
| 2010-01-17, 4:04 AM | |
 გაზაფხულზე, თბილისის და საქართველოს სხვა ქალაქების მუნიციპალურ არჩევნებზე უდაოდ გაიმართება ოპოზიციური დემონსტრაციები, რომელთანაც რუსეთი თავის ღია კავშირს პირველად დააფიქსირებს. მოსკოვი, ყოფილი პრემიერ-მინისტრის ზურაბ ნოღაიდელის მხარდაჭერის რეკლამას დაუფარავად ეწევა და ახლად შექმნილი პარტიის ”სამართლიანი საქართველოსთვის” ლიდერს საქართველოში ოპოზიციის ფავორიტ კანდიდატად წარმოაჩენს. ეს მოსკოვის მხრიდან ქართველი ოპოზიციური პოლიტიკოსისადმი სიმპათიის ღიად გამოხატვის პირველი შემთხვევაა. რუსეთის პრემიერ-მინისტრმა ვლადიმერ პუტინმა ნოღაიდელი მოსკოვში 23 დეკემბერს მიიღო. ეს ბოლო სამი თვის განმავლობაში ნოღაიდელის მოსკოვში ვიზიტის მესამე ცნობილი შემთხვევა გახლდათ. საგარეო საქმეთა მინისტრმა და სახელმწიფო მდივანმა გრიგორი კარასინმა ნოღაიდელი 27 ოქტომბერს და შემდეგ 24 ნოემბერს მიიღო "პოლიტიკური დიალოგის დაწყების”, ”რუსულ-ქართულ ურთიერთობებში რთული სიტუაციის” განხილვის და ”მოქალაქეებს შორის კონტაქტების გამარტივების” მიზნით (”ინტერფაქსი”, CIVIL GEORDIA, 27 ოქტომბერში, 24 ნოემბერი). ნოღაიდელთან 23 დეკემბრის შეხვედრას პუტინმა დუმას სპიკერი ბორის გრიზლოვი (რომელიც იმავდროულად პარტია ”ერთიანი რუსეთი”-ს უმაღლესი საბჭოს ხელმძღვანელია) და მოსკოვის მერი იური ლუჟკოვი დაასწრო. თითქოს, შეხვედრა საქართველოს მეორე ქალაქში ქუთაისში, საბჭოთა არმიის მონუმენტის დანგრევას ეხებოდა, თუმცა უდაოა რომ შეხვედრაზე გაზაფხულის პოლიტიკური ქმედებებიც განიხილეს. რუსეთის მთავრობის მიერ გავრცელებული ოფიციალური სტენოგრამის თანახმად (მხარდაჭერის ასევე უპრეცედენტო სიგნალი), ნოღაიდელმა გამოსთქვა ვარაუდი, რომ ის მოვა საქართველოს ხელისუფლებაში. ”ჩვენი პრიორიტეტია ქუთაისში მონუმენტის აღდგენა. ჩვენ ამ ვალდებულებას ვიღებთ, როგორც კი მოვალთ ხელისუფლებაში”. მან პუტინთან პრეზიდენტი სააკაშვილიც დაასმინა – ”სააკაშვილი რუსეთს და საქართველოს შორის შემორჩენილი კავშირების გაწყვეტას აპირებს”. ამ ლოგიკით საქართველოა ის ქვეყანა და არა რუსეთი, რომელმაც სამწლიანი ბლოკადა და სავაჭრო ემბარგო დააწესა, რითაც ”ეს კავშირები გაწყვიტა” ჯერ კიდევ 2008-წლამდე. მეტიც, ამ ლოგიკით საქართველოს ხელისუფლებამ ”ეს კავშირები გაწყვიტა” ქვეყნის დასავლური ორიენტაციის განსაზღვრისთვის (რაშიც თავად ნოღაიდელის წვლილიც არის, როცა ის პრემიერ-მინისტრად მუშაობდა). პუტინის თანდასწრებით, ნოღაიდელი დაეთანხმა გრიზლოვს, რომ ”ერთიან რუსეთ”-ს და მის პარტიას ”სამართლიან საქართველოს” შორის თანამშრომლობის ხელშეკრულება უნდა გაფორმდეს (”ინტერფაქსი”, 23 დეკემბერი). ნოღაიდელის რეგულარულმა კოორდინატორმა კარასინმა განაცხადა, რომ მოსკოვმა ოპოზიციის ამ პოლიტიკურ მოღვაწეს უპირატესობა მიანიჭა, რადგან ”ის გონიერია, მომავლისკენ იხედება და სხვა ქართველი პოლიტიკოსებისგან დადებითად გამოირჩევა” (”ინტერფაქსი”, ”იტარ-ტასი” 24 დეკემბერი). შეხვედრების ჩამონათვალი იმაზე მიუთითებს, რომ ნოღაიდელის მიმართ მოსკოვის კეთილგანწყობა სხვადასხვა დონეზე: რუსეთის მთავრობის, მმართველი პარტიის, საგარეო საქმეთა სამინისტროს და მოსკოვის მთავრობის დონეზე განისაზღვრება. ნოღაიდელი საკუთარი თავისგან და პარტიისგან ისეთ სუბიექტს წარმოაჩენს, რომელიც აფხაზეთთან და სამხრეთ-ოსეთთან რუსეთის საშუალებით შეთანხმებას ცდილობს. რაც გაუცხადებლად იმას გულისხმობს, რომ რუსეთის მფარველობით დიალოგს შეიძლება გარკვეული ფორმის რეინტეგრაციაც მოჰყვეს, თუმცა ეს როგორც სჩანს საქართველოს დამოუკიდებლობის ხარჯზე მოხდება. მოსკოვი ასეთი ქვეტექსტებით საუბრობდა დიასპორასთან გამართულ კონფერენციაზეც, რომლის ორგანიზატორებიც რუსეთში მდიდარი ქართველი ემიგრანტები იყვნენ. რუსეთის მაღალჩინოსნებმა არ უარყვეს მსგავსი მოსაზრებები, როდესაც ნოღაიდელი სამხრეთ-ოსეთთან და აფხაზეთთან დიალოგის აღდგენის წინადადებით გამოვიდა. სოხუმი როგორც სჩანს ამ მიმართულებით მოსკოვის ზრახვებზე ღელავს. 8 იანვარს, აფხაზეთის ”საგარეო საქმეთა მინისტრმა” სერგეი შამბამ საჯაროდ გამორიცხა ნოღაიდელს და აფხაზეთის ”პრეზიდენტს” სერგეი ბაღაფშს შორის შეხვედრა, რაც როგორც სჩანს ნოღაიდელმა მოსკოვში განიხილა (”ინტერფაქსი”, 8 იანვარი). მოსკოვს შეუძლია ნოღაიდელის პოლიტიკური რეიტინგის გაზრდა, თუკი სოხუმს და ცხინვალს მასთან დიალოგისკენ უბიძგებს, თუმცა ამ ყველაფერს მხოლოდ სიმბოლური ხასიათი ექნება, რაც ცალკეული ჰუმანიტარული ღონისძიებებით შემოიფარგლება. ამ შემთხვევაში მოსკოვი უნდა დაეხმაროს ნოღაიდელს, რომ ამგვარ დიალოგს, მინიმალური შედეგი მაინც მოჰყვეს. ნოღაიდელი, რომელიც ფინანსთა მინისტრად (2003-2005) და პრემიერ-მინისტრად (2005-2007) მუშაობდა წარმატებით ახორციელებდა საქართველოს ეკონომიკურ რეფორმებს. ის გულის ოპერაციის შემდეგ გადადგა და მისი ისედაც უკვე საკმარისად სერიოზული პირადი ქონების გაზრდა საბანკო ინვესტიციების სფეროში განაგრძო. ნოღაიდელმა საკუთარი პარტია ”სამართლიანი საქართველოსთვის” 2008 წლის დეკემბერში შექმნა და მხარს უჭერდა 2009 წელს რადიკალური ოპოზიციის მხრიდან რეჟიმის შეცვლის კამპანიას. ის ”რევოლუციური სცენარით” დაიმუქრა, რომელიც დაამხობდა სააკაშვილს, მშვიდობიანად თუ სამოქალაქო ომის საშუალებით, თუკი პრეზიდენტს 2009 წლის შემოდგომაზე – წინა არჩევნებიდან ერთი წლის შემდეგ – ვადამდელი არჩევნების დანიშვნას არ აიძულებდნენ (CHIVIL GEORGIA 8 ივნისი, 2009). ნოღაიდელთან დაახლოებული პირების ცნობით, ყოფილი პრემიერის პროგნოზი ასეთია: რუსეთის როლი საქართველოს საშინაო პოლიტიკაში გაიზრდება და შესაბამისად იგი ცდილობს თავი წარმოაჩინოს სააკაშვილის ალტერნატივად, რომელსაც რუსები მხარს უჭერენ. ოც წელზე მეტია, რაც მოსკოვი წარუმატებლად ცდილობს პატივსაცემი ან ეფექტური პოლიტიკური მოკავშირეების პოვნას საქართველოში, თუმცა ის მხოლოდ ”კაგებე”-ს ყოფილი ფიგურებით (როგორიცაა იგორ გიორგაძე), ჩრდილოვანი ბიზნესმენებით, ექსცენტრიული პოლიტიკოსებით ან ასლან აბაშიძის ბათუმური კლანით მანიპულირებას ახერხებდა. ამ ქვეყანაში რუსეთს არ ჰყავდა მოკავშირეები ან მის მიმართ სიმპათიით განწყობილი 20-კაციანი ჯგუფიც კი, რომელიც 2007 წლის შემდეგ არაკონსტიტუციური გზით რეჟიმის შეცვლას შესძლებდა. ასეთი ჯგუფები მარგინალიზებულია, თუმცა გაზაფხულზე ისინი შეიძლება ისევ ქუჩაში გამოვიდნენ. ნოღაიდელის სახით, მოსკოვმა მეინსთრიმული პოლიტიკოსი და ისტებლიშმენტის წარმომადგენელი იშოვა, შეძლებული ადამიანი, ორგანიზატორული უნარებით, რომელიც შესაძლოა მზადაა მისი ბედი კრემლს დაუკავშიროს. ასეთი მაგალითის ფონზე, მოსკოვს შესაძლოა იმედი აქვს რომ სხვა საჯარო ფიგურებს ან ბიზნეს-წრეების წარმომადგენლებსაც მოიმხრობს, თუკი სამოქალაქო ბრძოლა წელს კვლავ გაჩაღდება. | |
| ნანახია: 1046 | რამოტვირთვები: 0 | კომენტარი: 1 | | |
| სულ კომენტარები: 1 | ||||||
| ||||||
:p