| მთავარი » ფაილები » News |
"ხელისუფლების იძულება, მიხედოს ხალხის გასაჭირს, ერთადერთი ხსნაა"
| 2010-01-17, 4:02 AM | |
 გთავაზობთ ინტერვიუს შოთა რუსთაველის სახელობის სახელმწიფო პრემიისა და საქართველოს მართლმადიდებელი ეკლესიის უმაღლესი ჯილდოს - წმინდა გიორგის ორდენის მფლობელთან, მწერალ ჭაბუა ამირეჯიბთან. - ბატონო ჭაბუა, რა მიგაჩნიათ გასულ 2009 წელს ქვეყნის საზოგადოებრივ-კულტურული ცხოვრების ყველაზე წარმატებულ და ყველაზე წარუმატებელ მოვლენად? - საზოგადოებრივ-კულტურულ ცხოვრებაში 2009 წელს საქართველო ბევრი ვერაფრით დაიტრაბახებს, თუ მხედველობაში არ მივიღებთ ბათუმის მართლაც სანაქებო კონცერტებსა და თბილისში გამართულ ზეიმებს, მაგრამ მტკნარი სისულელე იყო და, მე ვიტყოდი, დანაშაულიც, ქუთაისში "გამარჯვების მონუმენტის" აფეთქება, რომელიც სრულიადაც არ იყო საბჭოთა კავშირის გერმანიაზე გამარჯვების მემორიალი. მერაბ ბერძენიშვილი ჩემი ძმაკაცია და ვიცი, რომ იმთავითვე ეს მონუმენტი ჩაფიქრებული და განხორციელებული იყო როგორც მეორე მსოფლიო ომში ამოწყვეტილი სამას ორმოცდაათი ათასი ქართველის ხსოვნის ძეგლი. ქართველ ერს გასულ წელსა და წლეულსაც ერთი უმძიმესი პრობლემა გვაწევს, უფრო მძიმე, ვიდრე ოსებმა და აბხაზებმა მოგვართვეს. მხედველობაში მაქვს შობადობა, რაშიც ის ფული რომ დაგვებანდებინა, ზეიმებს რომ მოვახმარეთ, მდგომარეობა რამდენადმე მაინც გაუმჯობესდებოდა. მეორე და არანაკლებ მნიშვნელოვანი არის ის პრობლემა, რომ ქართველები საკუთარი მიწა-წყლიდან უცხო ქვეყნებში გარბიან და ისედაც მცირერიცხოვან ქართველობას აკლდებიან, მართალია, გარკვეული ღონისძიებები ტარდება სამუშაო ადგილების შესაქმნელად, მაგრამ ეს არასაკმარისია იმისთვის, რომ ემიგრაცია შემცირდეს და უცხოეთში მცხოვრები რამდენიმე მილიონი ქართველობის მცირე ნაწილი მაინც დავიბრუნოთ. რაც შეეხება წარმატებულ მოვლენას, ხელისუფლება იძულებული შეიქნა, ხალხისკენ მობრუნებულიყო. ქალაქ თბილისის მერმა, ბატონმა გიგი უგულავამ ერთობ მნიშვნელოვანი ღონისძიებები ჩაატარა თბილისელთა ცხოვრების გასაუმჯობესებლად, მატერიალური გასაჭირის შესამსუბუქებლად. - რა მიგაჩნიათ "გზად ხსნისა" დღევანდელ რთულ სიტუაციაში? - "გზად ხსნისა" მიმაჩნდეს რაიმე რეალური, ამ მყვირალა (უხმოდ) თბილისელს რა გამაჩუმებდა, მაგრამ მაინც მოგახსენებთ, რაც ამ მხრივ მიფიქრია თუ მართებულად მიმაჩნია ვურჩიო საქართველოს ამჟამინდელ ხელმძღვანელობას: უპირველესი საკეთებელი სამუშაო ადგილების მატებაა, რაც მეწარმეთა ხარკის შემსუბუქებით მიიღწევა. მათ მიმართ საგადასახადო სისტემა ძირფესვიანად უნდა შეიცვალოს; შესაძლოა, ვცდები, მაგრამ თუნდ ეშმაკის ვალის შემწეობით პენსიები საარსებო მინიმუმს უნდა გაუთანაბრდეს და მესამე - იერიშია მისატანი უკანონოდ გამდიდრებული ადამიანების ჯიბეებზე, თუნდაც უკიდურესი ზომების მიღებით. სხვას ვერაფერს ვხედავ, რადგან დღევანდელი საქართველოს მცხოვრებთა მატერიალური გასაჭირი მსოფლიო ეკონომიკური კრიზისის გამოძახილია მნიშვნელოვანწილად და უპირველეს ყოვლისა. - რას უსურვებდით და რას ურჩევდით ქართველ ხალხს 2010 წელს? - უპირველეს ყოვლისა, მომთხოვნელობას ხელისუფლების მიმართ - ეს ყველა ხალხის, ყველა დროის უპირველესი მოვალეობაა, რადგან განცხრომით მცხოვრებთა იძულება, მიხედოს ხალხის გასაჭირს, ერთადერთი ხსნაა. WWW.GEOTOP.MOY.SU | |
| ნანახია: 904 | რამოტვირთვები: 0 | | |
| სულ კომენტარები: 0 | |